ދިވެހިރާއްޖޭއިން ބައިވެރިވެފައިވާ ބައިނަލްއަޤްވާމީ މުޢާހަދާތަކުގެ ފުރިހަމަ ބޭނުން ރައްޔިތުންނަށް ހިފޭނީ ދިވެހިރާއްޖޭގެ ދާޚިލީ ޤާނޫނީ އޮނިގަނޑުގެ ތެރެއަށް އެ މުޢާހަދާތައް ވައްދައިގެން ކަމުގައިވާތީ، އެ މުޢާހަދާތައް ދިވެހިރާއްޖޭގެ ދާޚިލީ އޮނުގަނޑަގެ ތެރެއަށް ވެއްދުމުގެ މަސައްކަތް ފިޔަވަހިތަކަކަށް ބަހާލައިގެން ކުރުމަށް އެޓަރނީ ޖެނެރަލްގެ އޮފީހުން ވަނީ މަސައްކަތް ފަށާފައެވެ.

މިގޮތުން، ފުތަރަމަ ފިޔަވަހީގައި ކުރުމަށް ހަމަޖެހިފައިވަނީ ދިވެހިރާއްޖެއިން ބައިވެރިވެފައިވާ އިންސާނީ ޙައްޤުތަކާގުޅޭ މުޢާހަދާތަކަށް ދިވެހިރާއްޖޭގެ ދާޚިލީ ޤާނޫނީ އޮނިގަނޑުގެ ތެރެއިން ޤާނޫނީ ބާރު ލިބިދިނުމުގެ މަސައްކަތެވެ. އެ މުޢާހަދާތަކަކީ:

* "ކޮންވެންޝަން އޮން ދި އެލިމިނޭޝަން އޮފް އޯލް ފޯމްސް އޮފް ޑިސްކްރިމިނޭޝަން އަގެއިންސްޓް ވިމެން" (ސިޑޯ) އާއި، އެމުޢާހަދާއާގުޅޭ އޮޕްޝަނަލް ޕްރޮޓޮކޯލް

* "ކޮންވެންޝަން އޮން ދަ ރައިޓްސް އޮފް ޗައިލްޑް" (ސީއާރްސީ) އާއި، އެ މުޢާހަދާއާގުޅޭ އެއް އޮޕްޝަނަލް ޕްރޮޓޮކޯލް ކަމުގައިވާ "އޮޕްޝަނަލް ޕްރޮޓޮކޯލް އޮން ދަ ކޮންވެންޝަން އޮން ދަ ރައިޓްސް އޮފް ދަ ޗައިލްޑް އޮން ދަ ސޭލް އޮފް ޗިލްޑްރެން، ޗައިލްޑް ޕްރޮސްޓިޓިއުޝަން އެންޑް ޗައިލްޑް ޕޯނޮގްރަފީ"

* "އިންޓަނޭޝަނަލް ކަވެނަންޓް އޮން ސިވިލް އެންޑް ޕޮލިޓިކަލް ރައިޓްސް" އާއި، އެމުޢާހަދާއާގުޅޭ އެއް އޮޕްޝަނަލް ޕްރޮޓޮކޯލް

* "އިންޓަނޭޝަނަލް ކަވެނަންޓް އޮން އިކޮނޮމިކް، ސޯޝަލް އެންޑް ކަލްޗަރަލް ރައިޓްސް"

* "ކޮންވެންޝަން އޮން ދަ ރައިޓސް އޮފް ޕަރސަންސް ވިތް ޑިސްއެބިލިޓީސް" އާއި އެ މުޢާހަދާއާގުޅޭ އޮޕްޝަނަލް ޕްރޮޓޮކޯލް

* "ކޮންވެންޝަން އަގެއިންސްޓް ޓޯޗަރ އެންޑް އަދަރ ކްރުއަލް، އިންހިއުމަން އެންޑް ޑީގްރޭޑިންގ ޓްރީޓްމަންޓް އޯ ޕަނިޝްމަންޓް" (ކެޓް) އާއި، އެމުޢާހަދާއާގުޅޭ އޮޕްޝަނަލް ޕްރޮޓޮކޯލް

މިދެންނެވި މުޢާހަދާތައް ދިވެހި ބަހަށް ތަރުޖަމާކުރުމުގެ މަސައްކަތް އެޓަރނީ ޖެނެރަލްގެ އޮފީހާއި ހިއުމަން ރައިޓްސް ކޮމިޝަން ގުޅިގެން ކުރަމުންދާ ކަމުގައި ދަންނަވަމެވެ.